السلام عليكم ..


طبعا زيت النارجيل هو نفسه زيت جوز الهند اذا جيتي تشترينه لازم تتأكدين انه يكون الزيت الاصلي اذا شكله متجمد ف العبوه يعني اصلي  ..لمن تسخنينه بيتحول شكله لزيت  ..

ضروري تستخدمين مع حمام الزيت غطا الشعر البلاستيك زي اللي ف الصوره عشان شعرك يمتص الزيت اكثر ويستفيد منه




 اسخنه شوي واحطه ع شعري ثم امشطه واسوي مساج لفروه الرأس  والفه زين واحط الغطا البلاستيك اخليه تقريبا ساعتين ثم اغسله انتبهي تخلين الزيت اكثر من ساعتين راح يكتم الشعر ومايوصله اكسجين وبكذا يعطيك نتيجه عكسيه  ..


رأيي فيه : لاحظت انه رطب شعري كثيرر وخفف النفشه  وعطاه لمعه مع الاستمرار  كنت انتظر انه يوقف التساقط بس ابدا ماوقفه  فأظطريت اني استخدم حبوب للتساقط وللحين ماشيه ف الكورس وبوافيكم بالنتائج اذا فادتني بعطيكم اسمها


 دعواتكم ..

السلام عليكم ..

مساء الخير .. موضوع اليوم يتكلم عن تشققات الفاونديشن
 هالمشكله يعانون منها اكثر شي البشرات الجافه وانا كنت اولهم  .. اول شي لازم نعرف ليه تطلع قشور وتتشققات

واهم الاسباب هي :
جوده الفاونديشن تكون رديئه او يكون ثقيل تغطيته فل كفر او يكون خاص بالبشره الدهنيه مايكون فيه ترطيب
ماتهتمين ف بشرتك  يعني تحطين الفاونديشن بدون ماتهيئين بشرتك وتقشيرها وترطيبها قبله

 ايضا ماتستخدمين البرايمر قبل الفاونديشن

نجي لحلول المشكله واهمها :
اختيار الفاونديشن المناسب: اذا بشرتك جافه وتطلع قشور حاولي تختاري فاونديشن يحتوي على مرطب ويكون خاص للبشره الجافه

اتبعي روتين ماقبل الفاونديشن ب ساعتين او اربع ساعات يكون الروتين عباره عن : تقشير تستخدمي مقشرر طبيعي زي السكر او زيت الزيتون او مقشر عادي واحلى مقشر عندي هو ديب كلين من نتروجينا مررا حبيباته صغيره وتقشر زين بحيث انها ماتذوب  بعد التقشيررر الترطيب جدا مهم اي مرطب يناسبك انا استخدم اورنج دايلي واخلط معه شوي من نيفيا سوفت اخليه لين تمتصه بشرتي .


اهم خطوه بعد الترطيب هي

 البرايمر وفيه انواع للبرايمر استخدمي برايمر للبشره الجافه.
ولازم يحتوي على ماده السيلكون عشان يسهل لك مد الفاونديشن على بشرتك .


 اهم خطوه والاخيره : كيف توزعين الفاونديشن ؟؟ابتعدي عن الفرش لانها بتطلع لك قشور استخدمي اسفنجه مثل ريل تكنيك او بيوتي بلندر انا استخدم ريل تكنيك    صورتها :

 لمن توزعين الفاونديشن انتبهي للاتجاه الدمج يكون على برا زي الصوره  


طبعا تكون الفرشه مبلله

 هذي طريقتي ف توزيع الفاونديشن والحمدلله ارتحت من القشور والتشققات

اتمنى انه فادكم الموضوع  .. ودعواتكم 

تغطيته متوسطه خفيف ع البشره..ثباته يدوم

احلا شي فيه انه خالي من العطور يعني يناسب البشره الحساسه وفي منه درجاته كثيرر
يعطي مظهر ديوي خفيف .. مافيه حمايه من الشمس

رأيي فيه : احس مو قد المدح اللي شفته عليه من البلوقرز لان تعليبه جدا سيء مايجي معه ضغاط😑ف صعب ف الاستخدام شوي  ..


 نصيحه اللي بشرتها جافه مرره توزعه بأسفنجه ريل تكنيك او بيوتي بلندر عشان مايطلع قشور

ولازم تشترين الضغاط معه عشان لاتتوهقين


 طبعا ماركه نارس مو متوفره بالسعوديه تقدرين تطلبينه اون لاين .
تقييمي له 10/8
سعره ناسيه بس فوق 100 .

برجع للتدوين مع هذا البوست .. اللي يتكلم عن مرطب ملون من بينفت اسمه "you rebel"

طبعا انا جربت كثير ببي كريم وللاسف ماناسبني ولاشي مشكلتي مع الدرجات دائما تجي اغمق من بشرتي  وكمان كنت اعاني من القشور مع الفاونديشن مع اني كنت اسوي تقشير وترطيب قبل بس بشرتي جافه كثير  

والحمدلله انحلت كل هالمشاكل مع هذا المرطب




يو ريبيل عباره عن مرطب ملون للبشره الجافه من بينفت اللي عندها قشور وتشققات وبشرتها جافه تستخدمه بيناسبها يعطي تغطيه بس خفيفه يعني يناسب ف النهار ويرطب ..
 كمان فيه نسبه حمايه من الشمس15 spf

 يجي منه  درجتين فاتح وغامق اللي عندي لايت الفاتح يعطي لوك ديوي ومايترك اثرر دهني بس ضروري اثبته بباودر واذا تبين تغطيه اكثر اخلطيه مع فاونديشن او كونسيلر .

مميزاته : تغطيه+ترطيب+حمايه من الشمس 👌 . .

سعره تقريبا 150 تلاقونه في وجوه وسيفورا
تقييمي له 10/8  لان سعره مبالغ فيه بس كميته كبيره مو راضي يخلص .


تشاو ..♡